「北海盜」上仗初跑五班即入Q。
剛周日賽事，潘頓在騎師王開飛時得1.16倍，1分未有而熱得如此誇張，頗有十拿九穩之感，雖然話首場之前已退出了「精算暴雪」，但騎師王仍為1.25倍全熱門，誰不知跑落之下，潘頓8場坐騎悉數被捧為大熱門，結果全數敗北，無論係下注騎師王還是逐場支持的馬迷，無不一地眼鏡碎。
另一方面，布文則繼續贏馬，剛戰贏出大熱門「安康萬里」，已成功3連勝，今次第2場策「北海盜」跑五班一哩，又有機會衝擊勝門。此駒上季來港後，至今11戰居然未勝，頗為令人意外，目前減至40分跑五班，單係4歲年輕力壯，兼且有一定戰鬥力已值捧。
「北海盜」前仗於四班上名獲減1分至五班，本來優勢甚明顯，但上仗於谷草一哩力拚下，卻負於情況雷同的「獎星」，兩匹四班上名馬獲減分，然後齊齊落五班串Q，的確係何其巧合。「北海盜」上仗入Q後居然1分不加，評磅員短期內對此駒第2次送大禮，練者賀賢無理由不好好把握機會吧？加上剛仗的亞軍雖然無甚威脅，但衝刺時其實有點受阻，今次際遇好一點，開齋坐正不足為奇。
延伸閱讀：